دورة تعليم الفوتوشوب (التدريب الأول)

السلام عليكم ورحمه الله وبركاته
من اليوم إن شاء الله هنجيب صور وهقولك إيه هي الخطوات عشان نعملها تعالوا نبدأ بالصوره دي عجبتني في بساطتها , وأكيد كلنا بنحب نحط صور عالفيس , فممكن نتعلم أزاي نعلم الصوره بتاعتنا
مين يعرف خطوات عمل الصوره دي

أول حاجه طبعاً هنفتح برنامج الفوتوشوب ونفتح صفحه جديده من قائمه Fileنضغط علي New أو لفتح صفحه جديده من الكيبورد نضغط Ctrl+N
هتظهر لنا الصفحه دي لو أنتوا فاكرنها

 

تعالوا كلنا نختار نفس الأبعاد 500 * 550 والدقه 72 وبعدين Ok

ومن صندوق الأدوات روحي أقفي علي الselection  

وبعدين أقفي علي صفحتك وأضغطي كلك يمين وأسحبي بحيث تكوني سايبه مسافه متساويه من كل الأتجاهات وتسيبي الماوس , بعدين هتلاقي الجزء اللي سلكتي عليه عباره عن نقط جمب بعضها , وفي بالته ألوان أسفل صندوق الأدوات أضغطي علي اللي فوق وأختاري اللون اللي أنتي عايزاه وبعدين روحي أفتحي Layerجديد من صندوق الLayer وأضغطي علي Alt+backspace عشان تلوني االسلكشن باللون اللي انتي اختارتيه وهتكون زي كده

 

بس لسه فاضل نبروز اللون زي الصوره ,وعشان نضيف بعض الصفات لأي Layerنقف عليه من صندوق الLayer, وندوس بالماوس دبل كلك هتظهر لينا صفحه أسمها Layer Style, وفي التصميم بتاعنا دلوقتي محتاجين نعمل إطار حول اللون , نقف علي Strokeونختار حجم الإطار هنحتاره 1 ونقف علي اللون ونختار لون الإطاروبعدين ok مرتين , وبكده نكون عملنا الإطار وده اللي هيظهرلنا الشكل ده وإحنا بنعمل الإطار

 

 

 

بعد لما تلوني هتلاقي لسه السلكشن متحدد إزاي نشيله عندك طريقتين الاولي من الكيبورد إضغطي Ctrl +Dاو من قائمه Select  أختاري Deselect

لو بصينا علي الصوره اللي أحنا عايزين نعمل زيها هنلاقي فاضل الكتابه ودي سهله جدا زي ما عرفنا في الدرس اللي فات من صندوق الأدوات ونختار أداه Text ونكتب الجمل اللي موجوده في الصوره أو أ] جمل تانيه أنتو حابين تكتبوها ,وفاضل كمان صوره اليد ندخل علي جوجل ونبحث عن صوره يد يلا الكل يبحث وينزل الصوره اللي عجبته .

بعدين أفتحوا البرنامج ومن قائمه File أختاروا openوأفتحوا الصوره اللي أنتوا نزلتوها , لو الصوره خلفيتها لون واحد هنقدر نستخدم عائله الMagic عشان نحصل علي اليد فقط , ولو حابين نفس صوره اليد إعملوا الخطوات التاليه .

• ننزل الصوره ونفتحها عن طريق البرنامج .
• بأستخدام أداه الselection نختار المستطيل اللي فيه صوره اليد .
• من الكيبورد نضغط علي Ctrl+Shift+i عشان نعكس السلكشن علي باقي الصفحه ونضغط Delete.
• هنلاحظ إن الجزء اللي اتمسح أصبح خلفيته بيضاء بس إحنا عايزينها شفافه , يبقي عايزين نحول الBackground اللي موجوده في صندوق الLayer إلي Layer ودي سهله جدا ًإننا نضغط دبل كلك عليها وبعدين اوك .
• نختار أداه magic نضغط حوالين اليد هتلاقي بدأت تتظل جزء كبير منها أهم شئ إنه ما يدخلش التحديد علي اليد بعدين نضغط Delete.
• وبعدين نحط صوره اليد علي صفحتنا ونكتب الكلام وبكده نكون خلصنا تصميم النهارده .

يارب يكون الكل أستفاد . ياريت أشوف الصور اللي عملتوها معايا .



صندوق أدوات برنامج الفوتوشوب

النهارده هنتعرف علي بعض الأدوات

شكل(3)

أول حاجه محتاجين نعرفها إن الكتاب مكون من صفحات يعني مينفعش أسيب صفحه فاضيه منغير ما أستغلها , لو نقلنا نفس المفهوم لبرنامج الفوتوشوب هنلاقيه فعلا ً عامل زي كتاب مكون من صفحات أنا اللي بنشئ كل صفحه فيه وطبعا ً لازم أستخدمها عشان ما أحملش وزن علي المشروع بتاعي وخلاص وكمان في ميزه أننا نكتب كل حاجه في صفحه عشان لو محتجتش الصفحه أقدر أمسحها,تعالو ا نشوف أستخدامات بعض الأدوات اللي في الشكل (3) .

•  رقم 1 تسمي ال selection وتستخدم هذه الأداه في تحديد أي جزء من أي صوره أو أي جزء من الصفحه , وهذه الأداه لها عائله ( يمكنك معرفه هل الأداه لها عائله أم لا ؟ ستلاحظون وجود مثلث مقلوب بأسفل الأداه ) يمكن إختيار شكل الselection بعد الضغط علي زر الماوس الايمن فيظهر باقي العائله , فيمكنا من إختيار الشكل المراد التحديد به  .
• رقم 2 تسمي Move Toolأداه التحريك  وبهذه الأداه تستطيعي تحريك أي Layer (ده زي الصفحه اللي في الكتاب بتقدر نكتب عليه أي حاجه وممكن نحذفه أو نمسحه ويعتبر الLayer هي أساس برنامج الفوتوشوب , إنكم تعملوا كل حاجه علي Layer عشان يمكنك من تعديله أو حذفه ).
• رقم 3 تسمي عائله ال Lassoوتستخدم عائله الLasso في عده إستخدامات منها ( تعديل جزء من الصوره بجزء أخر داخل الصور ودي هنفهمها بعدين لما نيجي نطبق عملي , وأستخدام تاني ليها أني عايز أقطع جزء من صوره أطرفها ليها نفس اللون فهكون محتاجه أستخدام الأداه دي وليها برضه إستخدامات تاني هنقولها بس في وقتها .
• رقم 4 تسمي عائله الMagic وتستخدم إيضا ً في تقطيع الصور ذات اللون الواحد.
• رقم 5 CropTool وتستخدم هذه الأده في تقتطيع الصفحه وأيضا َ تستخدم في تحويل حجم الصفحه إلي الجزء الذي تم إختياره بإستخدام هذه الأداه .

تعالوا نكتفي بالكم البيسط ده من الأدوات اللي ممكن من خلاله نعمل حاجه بعض التدريبات.

صندوق الLayerفي برنامج الفوتوشوب

يعتبر صندوق الlayer هو كلمه السر في برنامج الفوتوشوب , وتعالوا نمثله بشئ فالواقع عشان نفهم مدي أهميته لو حبينا نرسم رسمه علي الحيطه من الأسهل أننا نرسمها علي لوحه وبعدين نعلق اللوحه وفي الحاله دي اقدر اشيل اللوحه وأحركها أو حتي أرميها لكن مقدرش أشيل الرسمه من علي الحيطه أو أني أرميها , عشان كده بتظهر أهميه الLayer  .طب أزاي أفتح صندوق الLayer, عندنا طريقتين الأولي نضغط F7 والثانيه من قائمه window نضغط علي layer.
والشكل ده بيبين شكل صندوق الlayer

 

 

وكما هو مبين بالشكل نقدر نفتح layerجديد من أسفل صندوق الlayer و إذا أردنا حذف هذا الlayer نضغط علي الزر اللي قبله .

 



كيفيه فتح صفحه فوتوشوب جديده

السلام عليكم ورحمه الله وبركاته

إلي كل من لا يعرف أي شئ عن برنامج الفوتوشوب

إن شاء الله هنتعلم مع بعض A, B, Cفوتوشوب , هنتعرف علي الحاجات اللي موجوده فيه مع بعض خطوه خطوه واللي عنده أي مشكله مش محتاجه منه غير كمنت بالمشكله وهنحلها مع بعض إن شاء الله لأني عايزه اوصلكم تعملوا كروت شخصيه وكروت سبوع وكل حاجه ويكون مصدر شغل ليكم ,وكمان تتعلموا أزاي تلعبوا بالصور بتاعتكم وأي صور تحبوا تعملوها .

 

 أول حاجه محتاجين نتعلمها أزاي نفتح صفحه فوتوشوب وتعالو مع بعض نفتحها

لفتح صفحه فوتوشوب جديده عندنا طريقتين :

1.      من قائمه file نختار new  .

2.      من الكيبورد نضغط ctrl+n .

وده الشكل اللي هيظهرلنا لما نعمل أي طريقه منهم

شكل (1)

والصوره دي بتوضح أيه هي مكونات الشاشه اللي هتظهرلنا

شكل (2)

اول حاجه Nameوكنا بنكتب فيها أسم الصوره اللي عايزنها ونقدر نغير الاسم مره تاني عند الحفظ .

preset :ودي بنقدر نختار الحجم اللي عايزينه يعني مثلا لو شغل طباعه بنختار A4 أو زي ما أنت عايز بس غالبا ً ما أننا بنختار Custom عشان أحنا نحدد الأبعاد براحتنا .

Width: بنحدد فيها عرض الصفحه وجمبها بنختار وحده قياس العرض وغالباً طول ما أحنا بنعمل صور مش للطباعه بنختار الPixels.

Height:بنحدد فيه طول الصفحه وبرضه بتكون وحده القياس بتاعه العرض .

Resolution :وهنا بنحدد الدقه المطلوبه طبعا ً لو هنعمل شغل طباعه بنختار دقه 300 وهتلاحظوا إنه بيظهر حجم الملف بعد إختيار الدقه بصوا معايا فالصوره كده تحت يمين Image Size 805.7K الحجم ده بأختياري دقه 72 وطبعاً ده حجم مبدئي لسه لما أشتغل بس مش هتفرق معايا الحجم لو بشتغل شغل طباعه لكن لو هعمل صور وهحطها عالنت هتفرق معايا شويه .

Color Mode: من الأداه دي بنختار نوع الألوان لو طباعه بختار CMYK, ده خاص بالطباعه ,أما لو هشتغل صور عادي بنختار RGB.

Background Contents: دي بنحدد فيها شكل خلفيه الصفحه وفيها أنواع

• Background color:بمثابه إني بنيت حيطه ينفع ألونها كلها لكن لو لونت منها جزء مش هعرف أرجع فكلامي تاني , وكمان بقدر أحط عليه عدد لا نهائي من اللوحات (اللي هي Layers ) وبيكون جمبيها شكل القفل المقفول .
• White: بيخلي خلفيه الصفحه بيضاء .
• Transparent: يعني يخلي الخلفيه شفافه .

 بعد كده هنضغط ok .هيظهر لنا صفحه بيضاء عشان نعمل فيها اللي احنا عايزينه بس عشان نكتب محتاجين قلم ومسطره وأستيكه والعده , كمان برضه في برنامج الفوتوشوب عندنا عده بصراحه روعه , و المكان اللي فيه العده أسمه صندوق الأدوات اللي هو موجود في شكل (1) علي الشمال.
هنتعرف  المره الجايه إن شاء الله علي صندوق الأدوات وفيم يستخدم .

 

 

ما هو برنامج الفوتوشوب ؟ وفيم يستخدم ؟

بعتقد إن كلنا في الوقت الحالي مش محتاجين نعرف الفوتوشوب لأنه أصبح غني عن التعرف يكفي إن أسمه يدل علي وظيفته تعالو نقطع الكلمه ونشوف معناها فوتو تعني صور  , وشوب يعني محل و بمفهومنا البسيط نترجمها محل صور , هو فعلا ً برنامج الفوتو شوب ممكن يفتح أكتر من محل , ممكن نفتح أستوديو ونصور الناس ونعدل الصور علي الفوتوشوب , ممكن كمان نفتح مطبعه للي عايز يطبع إعلانات , ممكن نكون مصممين , وحاجات كتييييير قوي ممكن نعملها بأستخدام برنامج الفوتوشوب .

بعض إستخدامات برنامج الفوتوشوب :

• يستخدم برنامج الفوتوشوب في تصميم الإعلانات والبانرات .
• يستخدم برنامج الفوتوشوب في دمج الصور ودمج النصوص لعمل أشكال جديده جميله .
• يستخدم برنامج الفوتوشوب في عمل تصميمات الكتب والمجالات .
• يستخدم برنامج الفوتوشوب في تعديل الصور الشخصيه .
• يستخدم برنامج الفوتوشوب في مزج الصور والتلاعب بها .
• يستخدم برنامج الفوتوشوب في عمل الرسومات والصور الكرتونيه .
• يستخدم برنامج الفوتوشوب في عمل اللوجوهات .
• يستخدم برنامج الفوتوشوب في عمل الكروت الشخصيه وكروت السبوع ودعوات الأفراح .
• يستخدم برنامج الفوتوشوب تصميم المواقع .

عشان كده محتاجين كلنا نتعلم أزاي نتعامل مع برنامج الفوتوشوب بسهوله وسلااسه تامه .